Smá Arsenal blogg eftir tímabilið

Þó Arsenal hafi nú ekki riðið feitum hesti frá þessu tímabili titlalega séð, er ég mjög ánægður með fragang liðsins í vetur. Ég bjóst alls ekki við því að þeir yrðu í toppbaráttunni eins og þeir voru lengstum og jafnvel hörðustu stuðningsmenn sáu fyrir sér að þeir gætu hugsanlega lent í fimmta sæti.

Það var grátlegt að missa Flamini til Milan, þessi maður sem fáir jafnvel vissu hvað hét í fyrra, blómstraði á miðjunni með Fabregas og var eins og hjartað í liðinu. En hann valdi hærri samning en Arsenal gat boðið honum og þar við situr. Arsenal er með mjög stífa launastefnu og þeir brjóta ekki þau prinsipp sem þar eru sett. Þess vegna eiga þeir alltaf á hættu að missa leikmenn sem boðið er betri laun annarsstaðar.

Og nú er Hleb sagður vera á leið út einnig. Mér er svo sem slétt sama. Það hefur verið þvílíkt gaman að horfa á hann og leikni hans og takta, en svona gríðarlega mikill og hæfileikaríkur sóknarmaður sem hann er, hefur aðeins skorað 11 mörk fyrir Arsenal á þeim þremur tímabilum sem hann hefur spilað með liðinu. Það er algjörlega óásættanlegt og í hvert sinn sem maðurinn komst í færi stóð maður upp og fór að pissa, rétt eins og hálfleik, því maður vissi að ekkert myndi gerast.

Umboðsmaður Adebayor er að reyna að gera stöðu hans hjá liðinu torkennilega. Í dag birtast fréttir af því að hann fari fram á 80 þúsund pund á viku ef hann eigi að vera áfram. En áðurnefnt launaþak Arsenal leyfir það ekki. Djöfuls andskotans umboðsmenn, þeir eru að eyðileggja leikinn vinstri hægri. Einhverjar kenningar voru á bak við það í morgun að David Dein fyrrum stjórnarmaður Arsenal og fyrrum nánasti samstarfsmaður Wengers, stæði á bak við þessa frétt, því í henni var sagt að ef billjóner eins og Rússmann Usmanov - sem á hlut í Arsenal og vill eignast liðið allt og Dein starfar fyrir núna, ætti liðið, þyrfti það ekki að hafa áhyggjur af því að geta ekki borgað laun sem væru hærri en þetta launaþak. Menn nota öll meðul til að ná sínu fram.

Wenger karlinn er trúr þessari launastefnu og hann er samkvæmur sjálfum sér. Hann hefur sýnt það og sannað að hann finnur leikmenn fyrir skít á priki og gerir úr þeim stjörnur jafnvel á einni nóttu eins og var með Bakary Sagna í vetur. En hins vegar hlýtur það að vera frústerandi að þegar þessir ungu pungar eru loksins að verða alvöru leikmenn, séu þeir teymdir í burtu með gylliboðum annarsstaðar frá.

Ég hef trú á því að karlinn kaupi 2-3 menn í sumar. Hann gæti haldið áfram á sinni braut og komið inn með buch of no names, en eitthvað segir mér að hann fari örlítið ofar í reynslubanka leikmanna og sæki einhverja sem þegar hafa skapað sér eitthvað nafn og gætu fittað inn í þetta umhverfi hjá Arsenal. Liðið þarf varnarmann, mulningsvél a la Flamini á miðjuna og sókndjarfan miðjumann í staðinn fyrir Hleb.

"Helvítið hann Jens" eins og pabbi kallaði Lehmann alltaf þegar hann skeit á sig, er farinn og nú fáum við ekki meira af "samherja-hrindandi, tá-stígandi og dómara-tuðandi" Lehmann framar í Arsenal. Hann átti stóran þátt í velgengni liðsins undanfarin tímabil og ég er farinn að hallast að því að Wenger hafi gert ákveðin mistök með því að hleypa karlinum ekki aftur í markið í vetur þegar hann var búinn að jafna sig á meiðslunum. Hann hefur miklu stærri og meiri "viðveru" í markinu en Almunina og ég held að hann stjórni vörninni betur og njóti meiri virðingar varnarmanna en Almunia. En auðvitað má Jens kannski kenna sjálfum sér um líka, því hann var varla búinn að jafna sig á meiðslunum þegar hann fór að hrauna yfir Almunia greyjið og sýndi allt annað en liðshollustu og stuðning. 

Ég er enn í vafa um að það hafi verið rétt ráðstöfun að gera Gallas að fyrirliða, alveg eins og það voru mistök að gera Henry að fyrirliða á sínum tíma. Mér hefur alltaf fundist Gallas vera vælukjói per se og ekki hafa þessa leiðtogahæfileika sem til þarf til að leiða ungt lið inn á völlinn. Hann var í fýlu í fyrra og vildi jafnvel fara og ég held að hluti af dílnum við hann hafi verið sá að gera hann að fyrirliða til að halda honum. Frábær leikmaður, en ekki stór maður og mikill leiðtogi. Ég hefði viljað sjá Toure verða fyrirliða og Gilberto halda varafyrirliðastöðunni. Nú verður fróðlegt að sjá hvort enn verður breytt um fyrirliða og hvort að Fabregas verði fyrir valinu. Ég er þó meira hrifinn af því að hafa varnarmenn fyrirliða en menn sem eru úti um allan völl. Ég vil bara svona Adams-týpu sem fyrirliða, ég held að Kolo Toure sé rétti maðurinn.

 Það var vörnin sem brast í vetur. Þeir unnu að vísu betur í því að fá ekki á sig mörk eftir hornspyrnur og aukaspyrnur eins og tímabilið áður, en þeir fengu fullt af mörkum á sig eftir háa bolta upp miðjuna þar sem miðverðirnir eiga að hreinsa. Þeir misstu menn allt of oft framhjá sér í slíkum tilvikum og þa var óvanalegt að sjá. Toure var nú reyndar eins og hænsni þarna í vörninni eftir Afríkukeppnina og þeir náðu mjög illa saman hann og Gallas eftir hana. Besta frammistaða varnarinnar var gegn AC Milan bæði heima og úti, þegar Senderos starfaði þar eins og herforingi og gjörsamlega át sóknarmenn Milan. En því miður slökknaði sól hans ansi hratt í Liverpool maraþonleikjunum. Það vantar stöðugan miðvörð í liðið og það er nauðsynlegt að hafa þrjá heimsklassa miðverði í liðinu. Ég man bara í gamla daga þegar Adams, Bould og hinn snoppufríði Keown deildu þessu á milli sín.

Mín niðurstaða er sú að þetta hafi að mörgu leyti verið ásættanleg frammistaða og vissulega örlítið framar vonum. Næsta tímabil hefði verið tímabilið til að klára einhverja titla með þennan mannskap en þegar farið er að kvarnast úr leikmannahópnum er spurning hvað gerist og hvort að liðið fari enn og aftur á byrjunarreit hvað varðar uppbyggingu. Eða hvort að Wenger brjóti odd af oflæti sínu og ráði til starfa 2-3 reynslubolta til að bæta við hópinn.

Sjáum hvað setur.

 

Hleb á förum frá Arsenal

Athugasemdir

[Sigurpáll Ingibergsson, 9.5.2008 kl. 10:23]

Sæll Karl!

Fín greining hjá þér.

Við þurfum að verða meira en efnilegir, það er rétt hjá þér.  Það vantar öflugari vængmenn. Þegar Pires og Ljungberg voru á vængjunum, þá skiluðu þeir mörgum mörkum. Pires náði að skora 16 mörk á tímabili og Ljungberg sín 8.

Eins og þú nefnir, þá hefur Hleb, besti dribblari deildarinnar aðeins skorað 11 á þrem tímabilum og Eboue 2 á sama tíma.  Walcott mun vonandi verða skæður á næsta tímabili.

Þeir félagar, Flamini og Hleb voru síflissandi í stúkunni í síðasta leik á móti Everton. Fabregas sat á milli þeirra og var eðlilegri.  Ef við ráðum í líkamstjáningu þeirra félaga, þá verður Fabregas lengi hjá okkur.

[Aron (IP-tala skráð) 9.5.2008 kl. 11:05]

Mjög góð grein.  Frumskilyrði fyrir árangri á Emirates næsta tímabil er að halda Rosicky og v.Persie heilum.  Það verður gaman að sjá hvernig Vela kemur út og eins hvort Song tekur við stöðu Flamini eða sannar sig sem varnartröll.  En það er einfaldlega tvennt sem þarf að bæta og þá er þetta orðið heimsklassalið - þétta vörnina og fá fleiri mörk af köntunum.  Persónulega held ég að Walcott sé sá maður sem kemur til með að vera X-factorinn næsta tímabil.

 Gunners til I die!

[Ágúst Kr. Stefánsson., 9.5.2008 kl. 16:04]

Takk fyrir flotta grein! Sammála ykkur um vængmennina. Það vantar annað Pires og Ljungberg teymi. Mín vegna má hvít-rússinn fara. 11 mörk á þremur tímabilum er ósættanlegur árangur. Lemmi kallinn er kominn á aldur og Wenger setti hann inná í s.l. til þess að hann gæti hvatt áhangendurnar með reisn.  Hef trú á því að Almunia verði betri með tímanum þótt svo að hann standi Lemma langt að baki. Hvort Wenger hafi gert mistök með því að kippa Lemma út út liðinu í byrjun tímabils ætla ég ekki að dæma um.

Enginn átti von á því að við myndum trjóna á toppnum lungan af tímabilinu. Held að við munum verða mun sterkari á næsta tímabili og verður það Theo Walcott sem mun leika stórt hlutverk þar. Annars treysti ég meistara Wenger  fyrir áframhaldandi velgengni. Við vorum nálægt titlinum í ár, spái því að við munum lifta dollu á næsta tímabili.

P.s. Í viðtali á heimasíðu Arsenal blæs Adebæjorinn á allar sögusagnir um    brottför sína frá félaginu.

[Tryggvi Viðarsson (IP-tala skráð) 11.5.2008 kl. 14:27]

Ég get ekki gert annað en að taka undir það að Hleb megi fara mín vegna, finnst hann ekki jafn ómissandi og Flamini var, en svo fór sem fór. Þessi "monstermilljarðalið" einsog Chel$sea og AC Milan kaupa reynda talenta frá öðrum liðum, sem er kanski það sem vantaði uppá hjá Arsenal, reynslan til að halda fluginu og klára deildina á toppnum. Manni finnst svo mikil ólga bakvið tjöldin hjá Arsenal, og veltir maður fyrir sér hvort Stan Kroenke hafi á sínum tíma ekki verið akkúrat rétti maðurinn til að kaupa liðið! Hands off management og meira budget held ég að sé það sem Wenger kallinn vanti. Hann David Dein vildi Kroenke fyrst, og maður hefur á tilfinningunni að hann eigi eftir að koma aftur til samningsborðs með nýjan billjarðamæring, Usmanov eða einhvern annan. Sérstakt hvernig enski boltinn er að verða Fottball Manager hinna ofur ríku.

Hvað varðar Gilberto kallinn, sem vissulega hefur reynsluna er orðinn of hægur fyrir þetta lið, og manni fannst maður sjá óöryggið skína úr augunum á kallinum, en vissulega ber maður sterkar tilfinningar til mannsins, spurningin er samt sem áður hvort selja ætti hann ekki bara til West Ham eða Portsmouth.

Það verður gaman að sjá hvernig Carlos Vela spjarar sig í enska boltanum, hef það á tilfinningunni að hann og Walcott eigi eftir að verða baneitrað duo.

Hvað varða vörnina, þá vona ég að þar verði gerðar miklar breytingar, mér finnst Senderos og Eboue alveg gersamlega óþolandi karakterar og leikmenn.  Eboue er bæði of grófur, og of leikrænn spilari, liggur og vælir og ofleikur, hann er einnig svoldið eigingjarn og er að taka skjóta ótímabært á markið án árangurs (sem er reyndar eitthvað sem manni finnst oft vanta í aðra leikmenn sem væri líklegri til árangurs)  Senderos er einsog hann er, gerði gríðarlega afdrifarík mistök. Hann verður að fara. Hann er ekki réttur maður í svona lykilstöðu hjá Arsenal.

Almunia og Fabianski - maður veit ekki alveg, er voðalega smeykur þarna.  Finnst vanta reynsluna á milli þessara tveggja manna, þrátt fyrir að ég hafi verið mun sáttari við að hafa Almunia á milli stanganna en "helvítið hann Jens" Það sást í byrjun season að hann var búinn að missa það. Ég veit ekki með ykkur hina, en ég er voða spenntur fyrir litla Kasper Smækkel. Maðurinn var rosalegur í deildinni.

En það sem kostaði liðið titilinn voru meiðsl fastra manna, og er þá ekki spurningin hvort það vanti ekki breiddina í liðið.