Viðskiptahugmynd

Þriðjudagur, 17. júní 2008

Fari þetta að verða daglegt brauð að ísbirnir heimsæki okkur hér í Skagafjörð ber okkur að nýta þau tækifæri sem felast í því.

Í fyrsta lagi er þarna gullið tækifæri til að koma svæðinu á framfæri í erlendum fjölmiðlum. Hér þarf að setja upp fjölmiðlasetur þegar svona er ástatt þaðan sem upplýsingum er komið á framfæri við fjölmiðla út um allan heim. Fókus heimspressunnar gæti verið á svæðinu um þessar mundir, því yfirleitt sýna útlendingar því áhuga þegar reynt er að bjarga dýrum sem þessum.

Í öðru lagi eigum við í fullri alvöru að skoða þann möguleika að koma hér upp hvítabjarnargarði. Í stað þess að eyða tugum milljóna í hvert skipti til að koma þeim til síns heima aftur, eigum við að setja fjármagn í það að setja upp svona garð sem gæti haft jákvæð áhrif á ferðaþjónustuna á svæðiu. Búa til rammgerðan garð, þar sem þeir gætu spókað sig úti í náttúrunni og komið síðan upp sjávarkeri þar sem þeir gætu baðað sig og synt.

Hér þurfa þeir ekki að glíma við hita, ónei. Hér er meðalhitinn ekki nema 4-5 gráður yfir árið eða svo. Hér ætti að finnast landrými til þess arna.

Okkur ber að reyna að hlífa svona dýri og bjarga því, en ég sé bara ekki fram á það að við getum eytt í þetta tugum milljóna eins og þetta kostar klárlega, í hvert einasta skipti sem svona kvikindi gengur á land. Það er nefnilega allt eins í kortunum að þetta gerist örar en áður, skv því sem sérfræðingar segja. Að geta komið svona dýrum 4-5 saman í hvítabjarnargarð er eitthvað sem mér finnst að við ættum að skoða.

Ég hef nefnilega þá skoðun að fái svona dýr gott landrými til að spóka sig á, geti þau alveg haft það bærilegt og ekki verra í það minnsta en í sínum eðlilegu heimkynnum sem okkur er sagt að þau séu að hrekjast frá.