Sáði var óþekkastur

Þegar vel er að gáð er margt skondið og skoðunarvert í skáldskap um jólin og sýnist hverjum sitt. Við þekkjum vel argúmentið varðandi hið ástsæla lag "Jólasveinar ganga um gólf". Þar er rifist um hvort að menn eða könnur standi upp á hól eða stól. Og einnig hvort grýla hafi verið með gylltan staf í hendi eða gildan. Svona er það nú bara og ekki útlit fyrir að lát verði á þessum deilum.

Annað er þegar menn segja að jólasveinarnir séu 13 talsins, en á sama tíma er sungið lag um einn og átta. Hvaða jólasveina vantar þar? Ég kom nú með þá kenningu einu sinni að þetta lag um einn og átta vísaði í hæð þeirra. Að þeir séu í raun agnarsmáir og aðeins einn-núll átta á hæð, eða einn og átta. Þessi kenning mín hefur fallið í grýttan jarðveg víðast hvar, en eftir stendur spurningin um hvort þeir séu einn og átta, samtals níu, eða hvort þeir eru þrettán.

Einn er sá texti sem mér hefur fundist hvað skemmtilegastur. Adam átti syni sjö, eins og vel er vitað, en í textanum eru þeir ekki nefndir á nafn nema einn. Það er hann Sáði. Og trúlega hefur það verið vegna þess að hann var fyrirferðarmestur. Það var einmitt hann sem klappaði saman lófunum stappaði niður fótunum, ruggaði sér í lendunum og snér sér síðan í hring. Var líklega óþekkastur af þeim og því full ástæða til að yrkja sérstaklega um hann.

Og fyrst farið er að ræða um sáða, þá er hér einn góður frá kaffibrúsaköllunum. Þar var sagt frá einhverjum sem bananar voru farnir að vaxa út um eyrun á. Hann varð að vonum mjög svekktur, því hann sáði nefnilega eplafræjum!!

Hilsen

Athugasemdir

[Gunnar Helgi Eysteinsson, 22.12.2006 kl. 13:57]

Það væri hægt að skrifa bók um allt þetta... hm?!

[Áddni (IP-tala skráð) 23.12.2006 kl. 22:36]

Gleymdirðu ekki vini þínum og frænda Gretti Sig. og bara hlær úr Guttavísum. Já og svo auðvitað Þorgrími sem kallaður er Þorri og er sennilega þessi Þorri þjóðarinnar sem allir eru að tala um.

 Gaman að þessu ha........

 áddni