Útlendingamálin í körfuboltanum - uppfært vegna rangfærslu

Málefni erlendra leikmanna eru nú heitasta málið innan körfuknattleikshreyfingarinnar. Mörgum finnst fjöldi þeirra vera orðinn yfirþyrmandi á meðan öðrum finnst alveg sjálfsagt að vera með eins marga útlendinga og liðin treysta sér til.

Vandamálið er tvennskonar; annars vegar fá lið sér fleiri útlendinga einfaldlega til að eiga í leikmannahóp og hins vegar fer einskonar snjóbolti af stað, að þegar eitt lið fær sér annan eða þriðja útlendinginn, geta önnur lið ekki verið eftirbátar, því samkeppnin er mikil um titla.

En á þessu eru all margar hliðar.

Í fyrsta lagi sú að við búum hér inni á Evrópska efnahagssvæðinu og verandi í því, lifum við við frjálst flæði vinnuafls á milli þeirra landa. Við getum því ekki takmarkað fjölda erlendra ríkisborgara sem koma frá þessu svæði. Takmörkunin í dag er við einn erlendan leikmann utan EES svæðisins og þá erum við að tala um Kana í flestum tilfellum.

Í öðru lagi þá hefur íbúaþróunin og efnahagsþróunin hér á landi orðið sú að íslenskum leikmönnum finnst ekki lengur spennandi að fara út á land og spila eins og þeir gerðu í kippum hér áður fyrr til að ná sér í reynslu. Fólki fækkar á landsbyggðinni og launaskriðið nær ekki langt út fyrir suðvesturhornið og því fara leikmenn ekki út á land fyrir vinnu og húsnæði lengur. Lið úti á landi standa því frammi fyrir því að sækja sér liðsstyrk út fyrir landsteinana, því það er auðveldara en að lokka íslenska leikmenn út á land. Hér er ég aðeins að tala um viðhorf leikmannanna, ekki alla pappírsvinnuna sem þarf að vinna til að ná þeim hingað til lands.

En ein er sú leið sem menn hafa verið að ræða um og virðist vera að hljóta meira fylgis en áður. Það er svokölluð 3+2 regla sem við lýði er í Noregi, en hún kveður á um að alltaf verði þrír norskir ríkisborgarar að vera inni á vellinum í einu. Með þessu móti er norska sambandið að búa til sérreglur í sínu mótafyrirkomulagi í þágu innlendra leikmanna.

Leiðrétting. Reglan í Noregi er í raun 2+3, þ.e. að tveir leikmenn inni á vellinum verða að vera norskir ríkisborgarar. Í Rússlandi er þetta hins vegar 3+2. En prinsippið er það sama eftir sem áður og við getum haft þetta 2+3 eða 3+2 ef menn ákveða á annað borð að fara þessa leið.

Allt hefur sína kosti og galla. Ég er sjálfur persónulega ekki kominn að endanlegri niðurstöðu í þessu útlendingamáli. En ég held þó að eftirfarandi kostir séu við 3+2 leiðina:

* Lið koma til með að fá sér tvo mjög góða erlenda leikmenn í staðinn fyrir fleiri og lélegri.

* Liðin þurfa að byggja á eigin leikmönnum að stærri hluta sem hlýtur að hvetja þau til að gera vel og betur í barna- og unglingastarfinu.

* Innlendir leikmenn verða verðmætari sem ætti að gera íslenskum körfubolta gott. Liðin gætu þá hugsanlega farið að borga eigin "roll-players" fyrir að spila, í stað þess að flytja síka leikmenn inn og greiða þeim meira.

* Hugsanlegt er að góðir leikmenn sem finnast í neðri deildunum vilji koma upp í úrvalsdeildina og spila þar, því þar leynast vissulega áhugaverðir leikmenn.

En ókosturinn við þessa reglu er sá að lið sem byggja leikmannahópa sína á erlendum leikmönnum, 4-5 talsins eins og t.d. Tindastóll og KFÍ, gætu lent í vandræðum með að manna sitt lið hæfum leikmönnum sem spilað gætu í efstu deild á allra næstu árum. En með því að huga betur að barna- og unglinagstarfinu ætti að byggjast upp stærri og betri leikmannahópur til framtíðar litið. Við erum þá kannski að horfa upp á tímabundið ástand á meðan þessi uppbygging færi að skila sér. Spurningin er sú hvort að menn sætti sig við það?

 

Athugasemdir

[Rúnar Birgir Gíslason, 25.2.2008 kl. 10:37]

Flottur pistill, ég held að það verði að hugsa um heildina, líka á Króknum og Ísafirði.

[Bjarki Ármann (IP-tala skráð) 25.2.2008 kl. 15:04]

Heildina, já það er rétt það þarf að hugsa um heildina. Heildin er ekki á Króknum og heildin er ekki fyrir vestan. Það að langflest lið í efstu deild séu með 3 útlendinga ef ekki fleiri er nátturulega bara orðin tóm vitleysa. Til hvers að hafa yngriflokkastarf ef alltaf á að fá 4 útlendinga í liðið. Ef eitt lið fæ sér 2 útlendinga þá fá öll liðin sér tvo innan skamms, svo ef eitt fæ sér 3 útlendinga þá fá öll liðin sér 3. Við verðum bara að horfa í augun við þá staðreynd að hér er ekki atvinnumannadeild.

Til dæmis er enginn íslenskur leikmaður að fá borgað fyrir að spila körfubolta. Ef marka má þá samninga sem KKÍ hefur undir höndunum.

Svo að öll sjónarmið komi á hreint þá vil ég banna útlendinga utan EES og leyfa einungis einn innan, þangað til deildin hefur jafnað sig. Hvarf íslensku pointguardana er gott dæmi um hvernig útlendingavitleysan hefur farið með körfuboltann hér á landi.

Liðin útá landi kvarta að þau geti ekki fengið neina leikmenn til sín og fá sér þess vegna útlendinga. Málið er að þau nenna ekki að standa í því að lokka til sín leikmenn. Það er svo miklu þægilegra að fá til sín útlendinga á lágum lánum í lélegum gæðaflokk en hafa samband við unga og efnilega stráka. Bjóða þeim kannski smá pening eða húsnæði.

Það er kannski bara eitthvað við þessi bæjarfélög. Allavega sigra hólmarnir bikarinn og þeir eru með frábærann íslendingahóp. Greinilega auðveldara að fá unga drengi til að búa á Stykkishólmi en Sauðárkróki. Veit svo sem ekkert um það.

(varð aðeins lengra en ég ætlaði mér enda mér mikið hitamál)

[Rúnar Birgir Gíslason, 25.2.2008 kl. 15:17]

Sýnist að þú hafir misskilið mig Bjarki. Ég vil að menn á Króknum, Ísafirði og hvar sem er á landinu hugsi um heildarhagsmuni greinarinnar og að mínum dómi gerist það með fækkun útlendinga.

Það er eftir því sem mér skilst ekki möguleiki á að hefta fjölda erlendra leikmanna frá löndum innan EES, frjálst atvinnuflæði. En reglan um að hafa x marga Íslendinga á vellinum í einu er framkvæmanlega þó hún komi kannski meira niður á sumum félögum en öðrum eins og er. En þá verðum við að líta til heildarinnar eins og ég sagði áðan.

Svo er það góð spurning afhverju Stykkishólmur heldur frekar í leikmenn en Sauðárkrókur.

[Karl Jónsson, 25.2.2008 kl. 15:34]

Já þetta er hitamál vissulega. En það eru þarna punktar hjá þér Bjarki sem mig langar til að gera smá athugasemdir við.

Í fyrsta lagi það sem Rúnar minnist á, að þá getum við ekki takmarkað flæði leikmanna á milli landa innan EES. Það liggur bara algjörlega fyrir.

Hins vegar segir þú að félög úti á landi kvarti yfir að geta ekki fengið neina leikmenn og nefnir helstu ástæðuna fyrir því að þau nenni ekki að ná í þessa leikmenn. Það er auðvitað alveg út úr kú hjá þér og ég held að þú hafir lítið fyrir þér í því. Þetta snýst um það sem ég sagði í bloggi mínu hér að ofan, að  launaþróun skiptir þar mestu máli. Leikmenn sem á annað borð eru á vinnumarkaðnum, vilja að sjálfsögðu frekar vera í vinnu á höfuðborgarsvæðinu þar sem þeir fá betur borgað en úti á landi þar sem launin eru lægri.

Hins vegar er það spurning hvort að menn geti og eigi frekar að greiða íslenskum leikmönnum fyrir að koma og spila eða erlendum. Hugsanlega væri hægt að vega upp launamuninn með því. 

En fyrst og síðast snýst þetta um að barna- og unglingastarfið sé í lagi og liðin framleiði sína eigin leikmenn og þurfi ekki að kaupa til landsins einhverja meðalmenn.

[Sigurður Elvar Þórólfsson, 25.2.2008 kl. 16:47]

Góðar pælingar Kalli.

Ég hef aðeins verið að fjalla um þessi mál í Mogganum að undanförnu..

Það er búið að prófa ýmsar reglur í gegnum tíðina og Launaþakið var nú svar við öllu. Mér sýnist vera þegjandi samkomulag að gera ekki neitt í launaþaksmálum á þessari leiktíð...

Fjöldi erlendra leikmanna er alltaf afstæður eftir því hvar á landinu menn eru. Ég skil að þörfin fyrir erlenda leikmenn er mest á fámennum stöðum. En hvers vegna eru lið á borð við KR, Keflavík og Grindavík með þrjá útlendinga? Eða Fjölnir sem er í fjölmennasta borgarhluta Rvíkur.

Heilbrigð skynsemi ræður ekki ferðinni lengur og ég hef sagt það við mína vini að líklega væri maður betri í golfi ef þetta ástand hefði verið fyrir 20 árum.... maður hefði ekki látið bjóða sér það að sitja á rassgatinu og horfan á 3-4 erlenda leikmenn spila fyrir sitt lið.. 

[Ingólfur H Þorleifsson, 25.2.2008 kl. 21:24]

Gott kvöld.

Þar sem að mér er málið aðeins skylt þá ætla ég að tjá mig um það.

Málið er einfalt hér á Ísafirði, ef við hefðum ekki farið þessa leið þá værum við alls ekki með lið í vetur. Við reyndum við marga íslenska leikmenn fyrir tímabilið, fengum að vísu tvo en annar meiddist á landsmótinu og kom því ekki.

Við eigum 20  efnilega stráka sem eru í 9 og 10 flokk og eru nokkrir þeirra farnir að æfa með meistaraflokknum og hafa fengið að spila nokkrar mínútur í vetur. Fyrir nokkrum árum fórum við þá leið að nota unga og efnilega stráka sem við áttum. Við vonuðum að það skilaði sér til framtíðar bæði í því að þeir yrðu betri og fólk kæmi frekar á völlinn. Sú von brást að flest öllu leiti. Þrír þessara stráka eru enn að spila Þórir og Birgir Björn með okkur og Sigurður Þorsteinsson í Keflavík. Fólk hætti að koma á leiki og vegna hvers skildi það hafa verið, jú fólk vill sjá liðið sitt vinna leiki. Áhorfendum hefur verið að fjölga jafnt og þétt í vetur eftir því sem sigurleikjunum hefur fjölgað. Fólki er alveg sama hvaðan leikmennirnir eru svo lengi sem liðið vinnur.

Við munum fara sömu leið fyrir næsta tímabil að tala við íslenska leikmenn fyrst, en munum svo leita erlendis ef þess þarf. Við erum með mjög góðan þjálfara sem sem er með góðar hugmyndir fyrir framtíðina. Hér fá þeir sem leggja sig fram á æfingum að spila, sama frá hvaða landi þeir eru. 

En því miður hefur það verið svoleiðis í gegnum tíðina að allt of mikið af mömmu strákum hafa gefist upp áður en árangurinn hefur farið að sína sig. Við eigum nokkra svoleiðis sem voru mjög efnilegir en hafa gefist upp. Kannski er það okkur að kenna sem komum að rekstri félaganna. Maður sér það vel núna með Borce sem þjálfara að það er allt annar grunnur sem hann er að byggja upp hér en sá sem var fyrir.

Mín skoðun er sú að það eigi bara að leyfa okkur sem erum að reka þessi félög að gera það eins og okkur hugnast best. Launaþakið er t.d úrelt fyrirbæri og ég skammast mín ekkert fyrir að segja það að það eru allflest lið langt fyrir ofan það. Það vita allir sem vilja vita. Eftirlitsnefndin hefur ekki verið virk í langan tíma. Það er eins og það sé þegjandi samkomulag um að hafa þetta bara svona. Hvers vegna er þetta þak ekki tekið af.

Varðandi aðrar leiðir þá er ég jafn efins um allt sem heitir takmörkun eða höft. Körfuknattleikslið þurfa í dag að gefa öll laun leikmanna upp og eru því rekin eins og fyrirtæki. Fólk af EES svæðinu getur komið hingað og unnið eins og það vill og ég efast um að það standist lög að ætla að meina mönnum að leika körfuknattleik. Held að þetta sé bara það sem koma skal, íslendingarnir verða bara að fara að æfa jafn vel og erlendu leikmennirnir og þá leysist þetta af sjálfu sér.

Bestu kveðjur að vestan.

Ingólfur Þorleifsson

Formaður KFÍ (Balcan united)

[Bjarki Ármann (IP-tala skráð) 25.2.2008 kl. 23:08]

Þetta launaþak eins og það er í dag bara virkar ekki. Það vita allir. Ekki það að launaþak í sjálfu sér sé ekki gott heldur einungis það að það fer enginn eftir því.

Það vita allir sem koma nálægt körfunni að lang flest lið í úrvalsdeildinni eru langt fyrir ofan þetta og gefa ekki nægilega miklar upplýsingar um hvert pengingarnir fara.

Mig langar að velta einni spurningu hérna fyrir mér. Þar sem það er nú ekki margir leikmenn sem nenna að standa í svona skrifum hvað þá að koma undir nafni. Þá finnst mér nú samt að leikmenn eigi allavega að fá að segja hvað þeim finnst um útlendingavæðinguna.

Ég hef rætt við leikmenn úr örugglega flestum liðum á Íslandi sem spila í efstu og næst efstu deild. Ég á enn eftir að heyra einn leikmann segja "Hey mér finnst þetta fyrirkomulag frábært". Ég hef ekki einu sinni heyrt leikmann segja "þetta er bara nokkuð gott". 

Þrír útlendingar í hverju liði í efstu deild. Væri eins og 5 útlendingar í hverju fótboltaliði. Mér finnst að mörgu leyti að við ættum að taka fótboltann til fyrirmyndar. 

Rödd leikmanna heyrist ekki nógu hátt. Það þyrfti að stofna hagsmunasamtök leikmanna eða eitthvað því um líkt. En það er kannski hugmynd sem mætti ræða annarsstaðar. 

Leikmenn eru óánægðir! Það eitt dregur gæðin niður. Er það ekki annars sem fólk er að hugsa umgæði leiksins? Hvað með frammistöðu íslenska landsliðsins? Uppbyggingu efnilegra leikmanna? Hvernig væri ef karfan myndi borga öllum sínum leikmönnum eins og fótboltinn gerir? Afhverju ekki að stofna lið með 12 útlendingum?  

Ég veit dæmi um það að eftir að þriðji útlendingurinn kom í lið. Hættu diggir stuðningsmenn þess liðs að mæta á leiki og sögðu sig úr styrktarklúbb og fleira.

Ég veit að mín skoðun er einungis ein af mörgum. Það vantar kannski betri stað fyrir svona umræðu en bloggið þitt Kalli er bara ágætt fyrst þú fórst að ræða þetta á annað borð. :)  Ég hvet samt alla sem hafa skoðanir á þessu að tjá þær.

[Karl Jónsson, 26.2.2008 kl. 08:18]

Þetta eru áhugaverðir punktar hjá þér Bjarki varðandi afstöðu leikmanna til þessa máls. Ég hef þá trú að ef leikmenn taka sig saman og ræða þessi mál og setja niður hvað þeir vilja sjá gerast, geti þeir haft mikil áhrif á þróun mála, hvort sem þeir eru fylgjandi núverandi reglum og ástandi eða vilja sjá þetta fara í hina áttina.

En Ingólfur kemur inn á forsendur KFÍ-manna að hafa þetta eins og þeir hafa þetta í dag og það verður bara að segjast að þeir eiga fullan rétt á því að hafa þetta svona. Þetta hentar þeirra umhverfi og samfélagi og á meðan þeir eru að bíða eftir sínum eigin leikmönnum vilja þeir samt sem áður tefla fram samkeppnishæfu liði.

Þetta er ekki einfalt mál, en ég sakna radda leikmanna í þessari umræðu.