Arsenal-blogg 2 - næsta tímabil

Jæja þá er komið að vangaveltum um næsta tímabil hjá Arsenal. Ég vil þó halda því fram eftir talsverða yfirlegu að eftirfarandi ástæður hafi legið að baki því að liðið missti flugið í deildinni í vetur:

Meiðsli þeirra Van Persie, Rocisky og Eduardo, Afríkuferð Toure, skortur á leiðtogahæfileikum fyrirliðans og Almunia í markinu frekar en Lehman. Þetta er mín prívat skoðun.

Wenger hefur sagt það lykilatriði að halda núverandi leikmannahópi saman. Ég er innilega sammála því og þó Flamini hafi dottið úr skaftinu verður að ná að halda hinum inni. Á þessari stundu eru þó ennþá vangaveltur um að Hleb sé að fara, en ég á ekki von á því satt best að segja.

Leikaðferð.

Mér hefur fundist það ákaflega spennandi kostur fyrir Arsenal að spila 4-5-1. Með alla þessa fljótu og sókndjörfu miðjumenn og með svona líkamlega sterkan senter eins og Adebayor finnst mér það ákaflega freistandi fyrir Wenger að halda sig við þá leikaðferði. Ímyndið ykkur þessa miðjulínu frá vinstri: Van Persie, Rosicky, Gilberto (fyrir framan vörnina), Fabregas og Walcott (Hleb?). Ég hef nefnilega þá trú að á fimm manna miðju geti Gilberto alveg skilað einu góðu tímabili í viðbót, ef ekki gæti Diaby tekið varnarmiðjustöðuna og skilað henni með sóma.

Markvarðarstaðan.

Almunia, Fabianski og Mannone. Ég veit ekki hvað skal segja hérna. Þrátt fyrir að Almunia hafi spila vel á síðasta tímabili finnst mér hann ekki hafa þannig nærveru að hann eigi að vera aðalmarkvörður í stórliði eins og Arsenal. Hann þarf alla vega eitt topptímabil til að sannfæra mig. Arsenal á að vera með landsliðsmarkvörð í sínu liði, af hvaða þjóðerni sem það er. Seaman og Lehman sem vörðu markið áratugum saman leyfi ég mér að segja voru þannig leikmenn. Fabianski er kannski framtíðarmarkvörður, ég vona það, en það á allt eftir að koma í ljós.

Vörnin.

Heilt yfir er ég mjög sáttur við hina fjóra fræknu í vörninni; Sagna, Toure, Gallas og Clichy. Afríkukeppnin fór þó illa í Toure en það verður engin slík keppni á næsta tímabili. En það eru leikmennirnir sem eiga að bakka þessa félaga upp sem ég hef meiri áhyggjur af. Eins og Senderos getur spilað frábærlega sbr. AC Milan leikina, getur hann verið eins og algjört þvaghænsni inn á milli. Liðinu vantar því þriðja áreiðanlega miðvörðinn í hópinn að mínu mati, einhvern sem hægt er 100% að treysta á. Song hefur skilað miðvarðarstöðunni í þessum leikjum sem engu máli skipta nú undir lokin, en ég hef efasemdir með hann, hann hefur einhvern veginn alltaf farið í taugarnar á mér, veit ekki af hverju. Traore og sauðnautið Eboue sem maður býst við á hverri stundu að taki gott karatespark í andstæðinginn bara út af því hversu heimskur hann er, geta vel bakkað bakverðina upp. Þannig að ég panta hér einn klassa miðvörð í hópinn. Mín spá er sú að Wenger haldi sig við þessa fjóra kappa sem sinn fyrsta kost.

Miðjan.

Ég er sammála þeim sem hafa tjáð sig hér á bloggi mínu um að liðinu vanti kantmenn sem geti skorað. Hleb er greinilega vanari stærri mörkum í Hvíta-Rússlandi og alveg fyrirmunað að skora í mörkin á Englandi. En ég vildi sjá Van Persie taka vinstri kantinn og Walcott þann hægri og þá er liðið komið með gríðarlega sókndjarfa og snjalla kantmenn og með Rosicky, Fabregas og Gilberto/Diaby inni á miðri miðjunni erum við að tala um flotta miðju.

Ef karlinn heldur sig við fjóra miðjumenn vildi ég sjá Rosicky úti vinstra megin og Walcott úti hægra megin en þá er Gilberto orðinn of hægur til að geta verið inni á tveggja manna miðju og Diaby er ekki alveg orðinn klár þar að mínu mati og því þurfum við að kaupa hér.

Mín óskamiðja frá vinstri; Van Persie, Rosicky, Gilberto, Fabregas, Walcott.

Senterar.

Ekki flókið í sjálfu sér, Adebayor er okkar skæðasti senter nú um stundir og á enn eftir að bæta sig að mínu mati. Bendtner er að koma sterkur upp líka og svo eru það náttúrlega Van Persie og Walcott sem geta spilað senterinn líka, en ég vil sjá þá á sókndjarfri miðju. Þá eigum við Gilberto inni en enginn veit hvernig hann kemur undan meiðslunum blessaður karlinn.

Óskasenter; Adebayor. Tveir óskasenterar; Adebayor og Van Persie.

En þetta eru bara vangaveltur. Ég er á því að það vanti sterkan miðvörð og sterkan miðjumann ef AW ætlar að halda sig við fjögurra manna miðju en ég bið hann um að skoða það alvarlega að fara í fimm manna miðju og vera með þá Van Persie og Walcott úti á köntunum. Ég mun bjalla í karlinn og ræða þetta við hann við tækifæri.

 

Bara slétt sama!

Þó fagráðið hafi ekki rætt við þolendur. Að tefja framvindu máls sem þessa í marga daga er algjörlega óásættanlegt.

Fulltrúi fagráðsins ræðir við foreldra þolenda til að "styðja" þau! Og það tekur 10 daga!!

Þetta er óþarfur milliliður og svona mál á ekki á nokkurn hátt að tefja.

Fagráð ræddi ekki við meintan þolanda

Smá Arsenal blogg eftir tímabilið

Þó Arsenal hafi nú ekki riðið feitum hesti frá þessu tímabili titlalega séð, er ég mjög ánægður með fragang liðsins í vetur. Ég bjóst alls ekki við því að þeir yrðu í toppbaráttunni eins og þeir voru lengstum og jafnvel hörðustu stuðningsmenn sáu fyrir sér að þeir gætu hugsanlega lent í fimmta sæti.

Það var grátlegt að missa Flamini til Milan, þessi maður sem fáir jafnvel vissu hvað hét í fyrra, blómstraði á miðjunni með Fabregas og var eins og hjartað í liðinu. En hann valdi hærri samning en Arsenal gat boðið honum og þar við situr. Arsenal er með mjög stífa launastefnu og þeir brjóta ekki þau prinsipp sem þar eru sett. Þess vegna eiga þeir alltaf á hættu að missa leikmenn sem boðið er betri laun annarsstaðar.

Og nú er Hleb sagður vera á leið út einnig. Mér er svo sem slétt sama. Það hefur verið þvílíkt gaman að horfa á hann og leikni hans og takta, en svona gríðarlega mikill og hæfileikaríkur sóknarmaður sem hann er, hefur aðeins skorað 11 mörk fyrir Arsenal á þeim þremur tímabilum sem hann hefur spilað með liðinu. Það er algjörlega óásættanlegt og í hvert sinn sem maðurinn komst í færi stóð maður upp og fór að pissa, rétt eins og hálfleik, því maður vissi að ekkert myndi gerast.

Umboðsmaður Adebayor er að reyna að gera stöðu hans hjá liðinu torkennilega. Í dag birtast fréttir af því að hann fari fram á 80 þúsund pund á viku ef hann eigi að vera áfram. En áðurnefnt launaþak Arsenal leyfir það ekki. Djöfuls andskotans umboðsmenn, þeir eru að eyðileggja leikinn vinstri hægri. Einhverjar kenningar voru á bak við það í morgun að David Dein fyrrum stjórnarmaður Arsenal og fyrrum nánasti samstarfsmaður Wengers, stæði á bak við þessa frétt, því í henni var sagt að ef billjóner eins og Rússmann Usmanov - sem á hlut í Arsenal og vill eignast liðið allt og Dein starfar fyrir núna, ætti liðið, þyrfti það ekki að hafa áhyggjur af því að geta ekki borgað laun sem væru hærri en þetta launaþak. Menn nota öll meðul til að ná sínu fram.

Wenger karlinn er trúr þessari launastefnu og hann er samkvæmur sjálfum sér. Hann hefur sýnt það og sannað að hann finnur leikmenn fyrir skít á priki og gerir úr þeim stjörnur jafnvel á einni nóttu eins og var með Bakary Sagna í vetur. En hins vegar hlýtur það að vera frústerandi að þegar þessir ungu pungar eru loksins að verða alvöru leikmenn, séu þeir teymdir í burtu með gylliboðum annarsstaðar frá.

Ég hef trú á því að karlinn kaupi 2-3 menn í sumar. Hann gæti haldið áfram á sinni braut og komið inn með buch of no names, en eitthvað segir mér að hann fari örlítið ofar í reynslubanka leikmanna og sæki einhverja sem þegar hafa skapað sér eitthvað nafn og gætu fittað inn í þetta umhverfi hjá Arsenal. Liðið þarf varnarmann, mulningsvél a la Flamini á miðjuna og sókndjarfan miðjumann í staðinn fyrir Hleb.

"Helvítið hann Jens" eins og pabbi kallaði Lehmann alltaf þegar hann skeit á sig, er farinn og nú fáum við ekki meira af "samherja-hrindandi, tá-stígandi og dómara-tuðandi" Lehmann framar í Arsenal. Hann átti stóran þátt í velgengni liðsins undanfarin tímabil og ég er farinn að hallast að því að Wenger hafi gert ákveðin mistök með því að hleypa karlinum ekki aftur í markið í vetur þegar hann var búinn að jafna sig á meiðslunum. Hann hefur miklu stærri og meiri "viðveru" í markinu en Almunina og ég held að hann stjórni vörninni betur og njóti meiri virðingar varnarmanna en Almunia. En auðvitað má Jens kannski kenna sjálfum sér um líka, því hann var varla búinn að jafna sig á meiðslunum þegar hann fór að hrauna yfir Almunia greyjið og sýndi allt annað en liðshollustu og stuðning. 

Ég er enn í vafa um að það hafi verið rétt ráðstöfun að gera Gallas að fyrirliða, alveg eins og það voru mistök að gera Henry að fyrirliða á sínum tíma. Mér hefur alltaf fundist Gallas vera vælukjói per se og ekki hafa þessa leiðtogahæfileika sem til þarf til að leiða ungt lið inn á völlinn. Hann var í fýlu í fyrra og vildi jafnvel fara og ég held að hluti af dílnum við hann hafi verið sá að gera hann að fyrirliða til að halda honum. Frábær leikmaður, en ekki stór maður og mikill leiðtogi. Ég hefði viljað sjá Toure verða fyrirliða og Gilberto halda varafyrirliðastöðunni. Nú verður fróðlegt að sjá hvort enn verður breytt um fyrirliða og hvort að Fabregas verði fyrir valinu. Ég er þó meira hrifinn af því að hafa varnarmenn fyrirliða en menn sem eru úti um allan völl. Ég vil bara svona Adams-týpu sem fyrirliða, ég held að Kolo Toure sé rétti maðurinn.

 Það var vörnin sem brast í vetur. Þeir unnu að vísu betur í því að fá ekki á sig mörk eftir hornspyrnur og aukaspyrnur eins og tímabilið áður, en þeir fengu fullt af mörkum á sig eftir háa bolta upp miðjuna þar sem miðverðirnir eiga að hreinsa. Þeir misstu menn allt of oft framhjá sér í slíkum tilvikum og þa var óvanalegt að sjá. Toure var nú reyndar eins og hænsni þarna í vörninni eftir Afríkukeppnina og þeir náðu mjög illa saman hann og Gallas eftir hana. Besta frammistaða varnarinnar var gegn AC Milan bæði heima og úti, þegar Senderos starfaði þar eins og herforingi og gjörsamlega át sóknarmenn Milan. En því miður slökknaði sól hans ansi hratt í Liverpool maraþonleikjunum. Það vantar stöðugan miðvörð í liðið og það er nauðsynlegt að hafa þrjá heimsklassa miðverði í liðinu. Ég man bara í gamla daga þegar Adams, Bould og hinn snoppufríði Keown deildu þessu á milli sín.

Mín niðurstaða er sú að þetta hafi að mörgu leyti verið ásættanleg frammistaða og vissulega örlítið framar vonum. Næsta tímabil hefði verið tímabilið til að klára einhverja titla með þennan mannskap en þegar farið er að kvarnast úr leikmannahópnum er spurning hvað gerist og hvort að liðið fari enn og aftur á byrjunarreit hvað varðar uppbyggingu. Eða hvort að Wenger brjóti odd af oflæti sínu og ráði til starfa 2-3 reynslubolta til að bæta við hópinn.

Sjáum hvað setur.

 

Hleb á förum frá Arsenal

Nýr meirihluti innan skamms?

Maður spyr sig eftir þessa skelfilegu frammistöðu borgarstjórans í sjónvarpinu í kvöld.

Hann segist ætla að fara ofan í dagpeninga og sporslur til borgarstjórnarmanna sl þrjú ár. Ætli það sé með samþykki félaga hans í meirihlutanum?

Skrifstofustjóri Ólafs virðist ekki hafa komið eins að ráðningu Jakobs eins og Ólafur heldur fram.

Þetta er að verða ótúrlega vandræðalegt allt saman, Ólafur virðist koma sjálfstæðismönnum hvað eftir annað á óvart með framgöngu sinni og opinberum ummælum og þeir reyna eins og þeir geta að halda andlitinu og láta eins og ekkert hafi í skorist. Feisum það bara að þeir eru í fullri vinnu við að breiða yfir þessi klúður borgarstjóra.

Ég spái meirihlutaskiptum, að Sjálfstæðisflokkurinn og Samfylkingin fari saman í öflugan og sterkan meirihluta.

Sjáum til eftir 1-2 vikur.

„Ráðning í samræmi við reglur Reykjavíkurborgar"

Mikið er ég ánægður með að Guðjón Bergmann eyddi óvissunni!

http://www.visir.is/article/20080506/LIFID01/204054930

Ég sem sá fram á hungursneyð, svarta dauða og náttúruhamfarir.

Jibbý - frábærar fréttir!!

Hafa Grænlendingar ekki örugglega spilað á HM?

IHF staðfestir aðild Grænlands

Ráðherra skoðar biðraðir - nýir möguleikar í ferðaþjónustu á höfuðborgarsvæðinu

Kristjáni Möller var boðið að skoða biðraðir í Garðabæ í gærmorgun sbr. frétt á Eyjunni http://eyjan.is/blog/2008/04/28/kristjan-moller-bodid-ad-skoda-bidradir-i-gardabae/ 

Hér með skora ég á ferðamálayfirvöld á höfuborgarsvæðinu að gera sér mat úr þessu og markaðssetja biðraðir fyrir okkur landsbyggðarfólkið.

Við viljum kynna landsbyggðina sem kyrrlátt umhverfi með fallega náttúru sem hægt er að njóta, en á móti getur höfuborgarsvæðið markaðssett biðraðaferðir fyrir okkur, þar sem við fáum að skoða biðraðir úr lofti sem af landi og jafnvel upplifa stemninguna sem fylgir því að vera fastur í biðröð.

Hér um Hvítasunnuna ætla bændur að Syðri Höfdölum og Hótel Varmahlíð að bjóða upp á sauðfjárferðir norður í Skagafjörð, það er það sem við höfum m.a. upp á að bjóða í upplifunarferðamennsku.

Biðraðaferðir í borgina eru næsti stórsmellur höfuðborgarsvæðisins í ferðaþjónustu!

Ekki fæ ég vaskinn endurgreiddan af olíunni

Fá atvinnubílstjórar ekki endurgreiddan vsk af olíunni sem þeir kaupa? Ef líterinn kostar 160 krónur geta þeir innskattað um 31.50 krónur af því. Síðan eru trúlega flestir með sérsamninga við olíufélögin í gegn um safnkort, greiðslulykla og hvað þetta heitir allt saman.  

Ekki get ég innskattað mín olíukaup, ég þarf að greiða fullt verð.

Ætti það ekki frekar að vera almenningur í landinu sem mótmælti þessu?

Maður spyr sig.

Merkilegt með mótmælendur....

........ þeir verða alltaf jafn hissa á því þegar lögreglan tekur á þeim og leyfir þeim ekki að komast upp með að brjóta lögin. Þá er lögreglan sökuð um valdníðslu og að beita óþarfa hörku.

Lögreglan er til þess að halda uppi lögum og reglu í landinu. Ef einhver brýtur lög kemur til kasta hennar. Ef ekki gengur að tala um fyrir fólki, þarf að grípa til harðari aðgerða, þetta vita allir og þessir mótmælendur líka.

Trikkið hjá þeim er að ögra lögrelgunni fram í lengstu lög, bíða eftir því að harka færist í leikinn og væla svo sem fórnarlömb í fjölmiðlum. Ekki fá þeir samúð hjá mér í það minnsta og mér finnst lögreglan hafa sýnt af sér mikla þolinmæði í þessum mótmælum bílstjóra undanfarnar vikur.

Ég hef samúð með málstað þeirra, en saklausir borgarar verða fyrir barðinu á þeim. Það getur ekki gengið til lengdar. Þó ég skilji málstað þeirra, finnst mér mótmæli þeirra vera komin langt út yfir velsæmismörk og því miður fellur málstaðurinn algjörlega í skuggann af aðgerðunum þegar svona er komið.

 

Æi mikið er nú gott........

....að búa bara í sveitinni þar sem maður þarf ekki að hreyfa bílinn dögum saman.

Suðurlandavegi lokað á ný